ភ្នំព្រះរាជទ្រព្យ

រដ្ឋបាលរាជធានីភ្នំពេញបានចេញសេចក្ដីជូនដំណឹងនៅថ្ងៃទី២៤ ខែមេសា ឆ្នាំ២០២៥ អំពីការរៀបចំប្រារព្ធពិធីបុណ្យវិសាខបូជា ដែលគ្រោងនឹងប្រព្រឹត្តទៅនៅថ្ងៃទី១១ និងទី១២ ខែឧសភា ឆ្នាំ២០២៥ ខាងមុខនេះ។ បុណ្យវិសាខបូជាត្រូវបានចាត់ទុកជាបុណ្យដ៏សំខាន់មួយក្នុងព្រះពុទ្ធសាសនា។ ពុទ្ធសាសនិកជនទូទាំងពិភពលោក មិនថាជាបព្វជិត ឬគ្រហស្ថ តែងតែប្រារព្ធពិធីនេះជារៀងរាល់ឆ្នាំ ដើម្បីរំលឹកដល់ខួបអនុស្សាវរីយ៍ដ៏វិសេសវិសាលចំនួនបីរបស់ព្រះសម្មាសម្ពុទ្ធបរមគ្រូ គឺថ្ងៃដែលព្រះអង្គប្រសូត ថ្ងៃដែលព្រះអង្គបានត្រាស់ដឹងនូវសម្មាសម្ពោធិញ្ញាណ និងថ្ងៃដែលព្រះអង្គចូលបរិនិព្វាន។ ជារៀងរាល់ឆ្នាំ ពុទ្ធបរិស័ទខ្មែរតែងតែប្រារព្ធពិធីបុណ្យនេះនៅតាមទីវត្តអារាមនានាទូទាំងប្រទេស ដោយចាត់ទុកថាជាឱកាសដ៏ឧត្ដមសម្រាប់ការសាងបុណ្យកុសល។ សម្រាប់ឆ្នាំនេះ ពិធីបុណ្យវិសាខបូជានឹងប្រព្រឹត្តទៅរយៈពេលពីរថ្ងៃ.