ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍នៅថ្ងៃពុធនេះថា លោក គីម ជុងអ៊ុន បានណែនាំដល់កងទ័ពរបស់លោកឱ្យបង្កើនល្បឿននៃការបំពាក់អាវុធនុយក្លេអ៊ែរលើនាវាចម្បាំងរបស់កងទ័ពជើងទឹក។ ការបញ្ជានេះត្រូវបានធ្វើឡើងបន្ទាប់ពីលោក គីម ជុងអ៊ុន បានផ្ទាល់ត្រួតពិនិត្យការធ្វើតេស្តអាវុធសម្រាប់នាវាពិឃាដថ្មីបំផុតរបស់កូរ៉េខាងជើង ដែលមានឈ្មោះថា Choe Hyon។
យោងតាម KCNA ការណែនាំនេះធ្វើឡើងបន្ទាប់ពីលោក គីម ជុងអ៊ុន បានចូលរួមដោយផ្ទាល់ក្នុងការត្រួតពិនិត្យការសាកល្បងអាវុធសម្រាប់នាវាពិឃាដ Choe Hyon ដែលទើបនឹងសម្ពោធកាលពីសប្តាហ៍មុន ដោយមានវត្តមានកូនស្រីរបស់លោក គឺ ជូអេ (Ju Ae) ផងដែរ។
KCNA បានពណ៌នាថា នាវាពិឃាដ Choe Hyon ដែលដាក់ឈ្មោះតាមវីរបុរសប្រឆាំងជប៉ុន គឺជានាវាដែលមានទម្ងន់ ៥០០០តោន ហើយបានចំណាយពេលសាងសង់ជាងមួយឆ្នាំ។ អ្នកវិភាគយល់ថា នាវាពិឃាដនេះទំនងជាអាចបំពាក់មីស៊ីលនាវាទល់នាវា នាវាទល់អាកាស និងសូម្បីតែមីស៊ីលនុយក្លេអ៊ែរយុទ្ធសាស្ត្ររយៈចម្ងាយខ្លី។
គួរកត់សម្គាល់ថា KCNA ក៏បានរាយការណ៍ផងដែរថា កាលពីថ្ងៃទី២៨ ខែមេសា កូរ៉េខាងជើងបានធ្វើតេស្តបាញ់មីស៊ីលនាវាពិឃាដទំនើប មីស៊ីលនាវាចម្បាំងយុទ្ធសាស្ត្រ មីស៊ីលប្រឆាំងយន្តហោះ និងកាំភ្លើងធំស្វ័យប្រវត្តិ ១២៧មីលីម៉ែត្រដែលបំពាក់លើនាវា។ លើសពីនេះទៀត កាលពីថ្ងៃទី២៩ ខែមេសា ព្យុងយ៉ាងក៏បានធ្វើតេស្តបាញ់មីស៊ីលប្រឆាំងនាវា និងកាំភ្លើងស្វ័យប្រវត្តិដែលបំពាក់លើនាវាចម្បាំងផងដែរ។
ការជំរុញរបស់លោក គីម ជុងអ៊ុន សម្រាប់ការបំពាក់អាវុធនុយក្លេអ៊ែរលើកងទ័ពជើងទឹក គឺជាសញ្ញាបង្ហាញពីការប្តេជ្ញាចិត្តរបស់កូរ៉េខាងជើងក្នុងការអភិវឌ្ឍ និងពង្រឹងសមត្ថភាពយោធារបស់ខ្លួន ជាពិសេសសមត្ថភាពនុយក្លេអ៊ែរ។
